O desenvolvemento socioeconómico das rexións europeas está enormemente condicionado polo nivel de acceso e implementación da sociedade da información (SI) e desempeña un papel clave para o desenvolvemento e o crecemento do emprego.

As iniciativas levadas a cabo desde a UE en materia de sociedade da información son relativamente recentes e teñen dous fitos fundamentais: a iniciativa eEurope, coa posterior Estratexia de Lisboa, e o primeiro Plan de acción, eEurope 2002, que se concentraron  na ampliación da conectividade a internet en Europa. Posteriormente o Plan de acción eEurope 2005 pretendía traducir esta conectividade nun aumento da produtividade económica.

Neste marco, no II Cumio Mundial de Cidades e Gobernos Locais sobre SI (Bilbao, 2005), xorde a Axenda Dixital Local (ADL) como instrumento mundial de planificación para o desenvolvemento da sociedade da información a nivel local. A Declaración de Cracovia, auspiciada polo CEMR (Consello Europeo de Municipios e Rexións) e Eurocities, recompilou en 2005 a declaración de intencións das cidades europeas para dotarse de ADL  como medio para lograr estes obxectivos.

A Declaración de Nápoles (EISCO 2008) ratificou a estratexia de movemento para a implantación de ADL  mediante o uso de tres instrumentos clave:

1. O Plan da ADL, con horizonte temporal a tres anos;
2. O Pacto Local pola SI, orientado aos provedores locais de e-servizos;
3. O Foro de Cidadáns e Axentes Locais, co obxecto de promover, discutir e retroalimentar o plan entre cidadáns, empresas, expertos etc.

Nos novos marcos estratéxico da CE (2005-2010) i2010 e na posterior Europe 2020 apúntase a creación dunha Axenda Dixital Europea (2010-2015), para abordar os obstáculos principais a un auténtico mercado único dixital, promover o investimento en internet de alta velocidade e seguir traballando na eliminación da fenda dixital.