A necesidade de equilibrar o nivel de e-capacidades de gobernantes, equipos técnicos municipais, cidadáns e pemes; a escasa coordinación entre administracións e entre actores públicos e privados; o débil impacto estratéxico e retorno do investimento dos proxectos desenvolvidos; ou as dificultades orzamentarias e organizativas dos concellos que deben aplicalos e promovelos, están a contribuír a que se fagan maiores as fendas dixitais entre as cidades que aplican estratexias SE e as que non as aplican ou improvisan.

O proxecto ADL Eurorrexión, que xorde no marco da Estratexia i2010 da UE, que será substituída pola Axenda Dixital da UE (2010-2015), ten como finalidade achegar a Administración local dixital á cidadanía e fomentar o desenvolvemento social e económico sobre o recurso das tecnoloxías da información e a comunicación. Para conseguir este obxectivo, impulsarase o uso das TIC na contorna local, dotando a Administración das ferramentas apropiadas co fin de garantir a súa presenza, cada vez máis necesaria, na rede.